山寨積木同LEGO的質量差距
玩久了, 自然知道山寨積木同LEGO的質量差距, 相比之下, 山寨積木有好幾種件都做得十分不理想的, 例如印刷件, 透明件, 人仔, Tile件, 底板等等都無法跟LEGO相提並論, 於是我透過網上拍賣, 陸陸續續都買左好多LEGO散件
在幾種積木都玩過砌過以後, 我覺得LEGO 當然是上好的精品, 同山寨積木最大的質量差距在於, LEGO的件, 每一件都好有光澤"立立令", 接合位最FIT, 而山寨貨, 單論件的質量的話, 最優良的應該是小魯班(只是人仔不太靚)
至於開智同埋啟蒙, 係赤裸裸抄襲LEGO舊款SET的, 單論件的質量的話, 令人不太愉快的問題是件與件的接口位做得唔一定FIT, 此外幾乎每一個件都有D塑膠收口位"突"左出黎要用界刀批走或磨掉, 另外我最近砌屋仔時發現, 開智積木用黎砌牆的磚以及門框窗框, 其高度比標準的LEGO磚短左一兩毫米, 如此當幾舊磚砌高佢時, 就會發現唔止短左一兩毫米, 最終結論是, 砌屋仔, 開智磚混合其他廠牌的磚一起使用時會有些勉強...
← (這是開智消防局)
山寨積木主要都係啤口, 色澤, 光澤度等方面不及LEGO, 但都有辦法讓出黎個效果好D, 例如切口可以用界刀批走磨掉, 光澤度可以用一種模型用的打磨膏捽返光, 當然若嫌太麻煩的話, 還是玩LEGO好, 因為由於山寨積木接口位的質量不好, 時鬆時緊, 如果要砌mecha 一類由細細粒o既件組合而成的複雜設計, 基本上都是十分勉強的, 很遺憾不得不承認這對創造性而言無疑是一種致命的局限
所以我而家都陸續買左好多LEGO散件, 因為出黎個效果真係唔同D, 砌起上黎較為順心, 問題是真係會好貴, 一個未解的懸念是, 我到依家都唔知點樣可以成包成包以較平的價錢去買LEGO散件!
儘管山寨積木有著百般不是, 基本上我唔會對山寨積木反感, 始終一分錢一分貨, 例如一套新出的啟蒙鋼琴, LEGO版在信和買現成的要三百幾, 山寨版才15元一盒, 如果只是享受砌的過程和了解鋼琴大致的積木結構, 15元實在便宜多了, 有幾多資源就做幾多野吧, 我砌積木純粹旨在消磨時間, 不過其實即使是山寨磚, 只要是"磚盡其用", 也能砌出有趣的模型, 總之我唔會反感, 反而覺得山寨積木提供了大量廉價的素材突破了自由制作的限制, 始終砌野最重要還是要搵到適合的件, 件有時候唔夠就真係做唔到某樣野就做唔到.
可能忠實的LEGO迷會對我的意見會好反感, 如有冒犯實屬無心懇請包容體諒
